Abatuuze bakakkanye ku musajja agambibwa okubba embizzi ne bamukuba n'afiirawo

Omusajja ow'emyaka 35 agambibwa okuba omubbi w'embizzi, abatuuze bamukakkanyeko ne bamukuba ne bamuttira e Buikwe.

Omulambo gw'omusajja ono atannamanyika bimukwatako, gusangiddwa ku mabbali g'oluguudo ku kyalo Kafumbe mu muluka gw’omu Bibbo  mu ggombolola y'e Kawolo mu munisipaali y'e Lugazi mu disitulikiti y'e Buikwe leero kumakya.

Ku mabbali w'omulambo ogusuuliddwa ku luguudo oluva  e Lugazi okudda e Kasokoso, wabaddewo  embizzi ensale ng'epakiddwa  mu kiveera ekya kiragala, ng'esuubirwa okuba enzibe gye bamusanze nayo.

Ssentebe wa LC1 mu kitundu ekyo , Jane Namayega, y'atemezza ku poliisi n'eggyawo omulambo okugutwala mu ggwanika ly'e ddwaaliro e Kawolo okwongera okugwekebejja, ng'okubuuliriza bwe kugenda mu maaso.

Omwogezi wa poliisi mu Ssezzibwa, Hellen Butoto, avumiridde ekikolwa ky'okutwalira amateeka mu ngalo, n'agattako nti banoonya abaamusse.