Abazigu batemyetemye ssentebe wa Nakaseke ne bamuleka ng'aliko kikuba mukono

ABAZIGU abatanaba kutegerekeka bateeze ssentebe wa disitulikiti y’e Nakaseke ne bamutemaatema ebiso bwabadde ayingira mu maka ge agasangibwa ku kyalo Katale mu Semuto town kanso ng’ono yeefudde afudde bwe batyo ne badduka nga balowooza nti bamusse.

Abazigu bano babadde beekweese mu kasaka akali okumpi ne ggeeti ya Richard Mavuuma nga ono y’amyuka ssentebe wa disitulikiti y’e Nakaseke era nga yeegwanyiza ekifo ky’obwakkansala bwa Katale Ward ku disitulikiti y’e Nakaseke.

Bano olwabadde okulaba emmotoka ye ekika kya Corona nnamba UBF 459Y ne bava gye baabadde beekweese era baatandikidde ku kwasa ndabirwamu y’emmotoka ye era bwe batyo ne bamugyamu ne batandika okumukuba nga kwotadde n’okumutemaatema ebiso wabula bwe yalabye nga bagenda kumutta ne yeefuula afudde nga bano baalowoozezza nti afudde ne babulawo.

Mavuuma nga y’omu ku bannabyabufuzi abagundiivu mu disitulikiti y’e Nakaseke era essira alitadde ku kulaba nga NRM eddamu okufuna obuwanguzi mu disitulikiti y’e Nakaseke naddala mu Nakaseke South.

Mavuuma ali mu nkambiya  Nsereko Kawuuma Basajjasuubi eyeegwanyiza ekifo ky’omubaka owa Nakaseke South ekirimu omubaka Luttamaguzi Ssemakula nga Mavuuma okusinzira ku byamukoleddwako agamba nti ensonga zino zeekuusa ku byabufuzi.

Yategeezezza nti we yatuukidde awaka yabadde ava Luweero ng’alina empapula z’ekibiina kya NRM z’abadde atambuza eri bannakibiina bano.

Mavuuma era agambye nti abaakoze ekikolwa kino olwabadde okumutukako baabadde beesibye obukookolo mu maaso nga kyabadde kizibu okutegeera ffeesi y’omuntu kuba nga tebannaba kutandika okumukuba baamusibye akagoye mu ffeesi obutamukirizza kulaba baamukozeeko ffujjo.

Omwogezi wa poliisi mu bitundu bya Savannah Sam Twineamazima agambye nti poliisi etandise okunoonyereza okuzuula abaakoze ekikolwa kino, era nga Mavuuma poliisi y’e Semuto yamaze dda okumuggyako sitaatimenti okusobola okumanya b’ayinza okuba nga b’ateebereza.

Twineamazima alabudde banabyabufuzi abagenda mu maaso n’okukola efujjo ku bannaabwe n’agamba nti nga poliisi teyinza kukigumiikiriza kuba kimenya mateeka okutwalira amateeka mu ngalo.