Ekikwekweto ku babba emmwaanyi kitwaliddemu n'abasuubuzi!
Abamu ku basuubuzi baguumaazizza mbiro ne bassaako kakokola tondekanyuma ate abamu abakwatiddwa abatuuze basose kubakubamu okutuusa lwe bayise poliisi okuva e Busaana n'ebatwala..
Ekikwekweto ku babba emmwaanyi kitwaliddemu n'abasuubuzi!
Ekikwekweto eky'okufuuza ababbi b'emmwanyi n'abanoga eza Kiraga ne basuza abalimi nga bakukunadde kitwaliddemu n'abasuubuzi.
Ababbi b'emmwanyi n'abanoga eza kiragala bakwatiddwa e Kayunga mu bikwekweto ebikoleddwa ab'ekitongole ekirondoola omutindo gw'emmwanyi ki Uganda Quality coffee traders and processors association.
Waliwo abasajja babiri okuli Okello Ben ne Balikoowa Tom n'omusuubuzi Ochola George, abakwatiddwa ku kyalo Kyengera mu ggombolola y'e Busaana abasangiddwa mu ssamba ya mzee Mwemeke George.
Abalala abasangiddwa nga baanise emmwaanyi eza kiragala ku masitoowa beerwanyeeko ne bassaako kakokola tondekannyuma.
Akulidde ekikwekweto kino, David Ddembe Ssekitooleko akola nga field officer mu Uganda quality coffee traders and processors agambye nti omuyiggo gukyayinda ku basuubuzi n'abantu abadibaga omutindo gw'emmwanyi.
Ddembe asabye abakwasisa amateeka nga poliisi ne kkooti bateeke mu nkola ekiragiro kya pulezidenti nti ababbi b'emmwaanyi tebaweebwa bondi ku poliisi wadde bbeyiro mu kkooti kiyambe okukendeeza ku bubbi.
Omwogezi wa poliisi mu bbendobendo lya Ssezibwa Hellen butoto agambye nti abakwate bagguddwako omusango gw'okunoba emmwanyi eza kiragala wamu n'okubba emmwanyi oguli ku ffayiro nnamba SD 17/17/08/2026.