Bamusaayimuto 13 basiibuddwa okugenda mu Youth Games mu Angola

Akakiiko akalondoola ebibiina byemizannyo mu ggwanga aka National Council of Sports (NCS) kasiibudde ekibinja kyababamusaayimuto 13 okugenda mu ggwanga lya Angola okwetaba mu mizannyo gyabavubuka egya Africa Youth Games.
Empaka zino ez’omulundi ogwokuna zaakwetabwamu amawanga ga Africa 54 nga emizannyo gitandika nga 10 okutuusa nga 20 omwezi guno.
Uganda yaakwetaba mu mizannyo egyenjawulo omuli okuwuga, emisinde, okuzina, table tennis n’ensero eya 3X3.
Abazanyi abagenda kuliko Joseph Ssebatindira ne Jemimah Nakawala (Table Tennis), Jovia Anena, Brandina Kyalimpa, Shivan Mwesigwa ne Marion Apio (Basketball 3x3), Baskaline Cherotwo, Risper Chekwemboi, Keren Chelimo ne Kizito Loput (Baddusi).
Abalala kuliko Abner Isaiah ne Mary Peyton Ssuubi (Bawuzi) ne George William Ntulume owa break dance.
Abatendesi kuliko Alvin Katumba (Table Tennis), Jonathan Egau (Basketball), Immaculate Chemutai (Athletics), Olivier Nalwadda (Kuwuga) ne Frank Kimuli owa break dance.
President w’omuzannyo gwa Gymnastics mu ggwanga Harriet Ayaa yaakulembeddemu ekibinja kya Uganda era nga mugumu nti Uganda yaakukomawo nemidali egiwera. “ abavubuka bonna twasooka kubekeneenya netukakasa nti tututte tiimu kabiriiti” Ayaa bweyagambye.
Omukungu wa NCS Milton Chebet yakuutidde abazanyi okukuuma empisa bokugoberera ebiragiro byabatendesi. Chebet yakakasizza abazanyi nga gavumenti bwerina enteekateeka esiima abazanyi abanaaba bakoze obulungi mu mpaka eziri ku mutendera gwensi yonna.
Abanaaba bakoze obulungi bajja kuyitamu okukiikirira eggwanga mu mizannyo gya youth Olympic games egigenda okubeera mu kibuga Darkar ekya Senegal omwaka ogujja.   
Tiimu essubirwa okusitula olwomukaaga okwolekera ekibuga ekikulu Luanda ekya angola emizannyo gyegigenda okunyumira.