Weasel bamuddusizza mu ddwaaliro ng'ali bubi

OMUYIMBI Douglas Mayanja amanyiddwa nga Weasel, atwaliddwa mu ddwaaliro e Nsambya gy'ali mu kujanjabibwa ku bigambibwa nti mukazi we omukonyesezza emmotoka mu bugenderevu.

Bino bibadde ku bbaala ya Shan's Bar e Munyonyo mu munisipaali y'e Makindye mu Kampala, ku ssaawa nga Mukaaga ogw'ekiro ,oluvannyuma lw'okufunamu obutakaanya ne bawanyisiganya ebigambo.

Poliisi e Kabalagala ekutte mukyala wa Weasel, Sandra Teta ku bigambibwa nti amutomedde mu bugenderevu , bw'abadde avuga emmotoka UBH 148 Y era nga nayo ekumiirwa ku poliisi e Kabalagala.

Amyuka omwogezi wa poliisi mu Kampala, Luke Oweyesigyire, agambye nti , Mayanja , basoose kumutwala mu ddwaaliro lya Mukwaya, ne bamwongerayo e Nsambya gy'afunira obujanjabi, ng'okunoonyereza , kugenda mu maaso.