Kitalo! abadde ssenkulu w'ettendekero ly'abasomesa ery'e Namutamba afudde!

Abadde akulira ettendekero lya Namutamba TTC, Livingstone John Katana 73 , afiiridde mu ddwaaliro e Nsambya oluvannyuma lw'okugwa ku kabenje mu wiiki ewedde.

Katana era y’abadde omukubiriza w'obulabirizi bw'e Mityana era nga mutuuze w'e Namutamba mu Ggombolola y'e Bulera, yafunye akabenje ng'ali n'abantu abalala babiri.

Mmotoka ekika kya Kluger gye baabaddemu

Mu mmotoka, baabaddemu ne  Steven Kayinnamula era nga ye yayabadde ddereeva w'emmotoka ekika kya Kluger nnamba UBE 726 J ne Christine Nampiima Kigongo Kayongo nga bonna b'e Namutamba.

Kigambibwa, nti akabenje , kaabadde Kikonge ku luguudo oluva e Kampala okudda e Mityana, bwe baatomereganye n'emmotoka endala Harrier nnamba UBF 706 W, ng'omugenzi ne banne abalala babiri, baasoose mu kalwaliro okumpi awo nti ye Katana ne bamwongerayo e Nsambya gy'afiiridde leero.

Omwogezi wa poliisi mu Wamala, Lamerk Kigozi , ategeezezza nti okunoonyereza ku kabenje kano, kugenda mu maaso era n'eyabadde avuga Harrier , bakyamuyigga.