Abali mu mulimu gw’okupangisa emmotoka beevuma amafuta ne ddoola ebirinnya buli lukya nga bagamba nti bikosezza nnyo bizinensi yaabwe. Okuva amafuta bwe gaatandika okulinnya, bano bagamba nti amagoba gaabwe gaakendeera kyokka nga balina okusasula abakozi, emisolo n’emisoso gya bizinensi emirala nkumu. Kino bagamba nti kireetedde bannaabwe bangi okuli ne kkampuni ennene okuva mu mulimu guno kyokka nga guwa abavubuka bangi emirimu n’okutambuza abakungu omuli n’abava ebweru.
Ye Lavigerie Nkurunungi akulira kkampuni ya Mercantile Car Rentals akubiriza abali mu mulimu guno okwettanira emmotoka z’amasannyalaze ezikozesa ttekinologiya owoomulembe. Zino agamba nti ziyamba okutambuza bizinensi naddala mu kiseera kino eky’akatuubagiro k’ebyenfuna.

Nkurunungi awa abapangisa emmotoka okwettanira ez'amasannyalaze